პოლონეთის პირველი ატომური ელექტროსადგურის EPC კონტრაქტი Bechtel-სა და Westinghouse-ს გადაეცა

Bechtel-სა და Westinghouse-ის კონსორციუმმა პოლონეთის პირველი ატომური ელექტროსადგურის საინჟინრო, მომარაგებისა და მშენებლობის (EPC) კონტრაქტი მოიპოვა. კონტრაქტი სახელმწიფო კომპანიამ Polskie Elektrownie Jądrowe-მ (PEJ) გადასცა. ობიექტი ბალტიის სანაპიროზე, პომერანიის რეგიონში მდებარე Choczewo-ში აშენდება. PEJ-ის ცნობით, სადგური ელექტროენერგიას 2036 წელს გამოიმუშავებს.

EPC კონტრაქტის ძირითადი კომერციული პირობები შეთანხმებულია. დარჩენილ საკითხებზე დეტალური მოლაპარაკებები გაგრძელდება.

ამჟამად მიმდინარეობს მოსამზადებელი სამუშაოების მეორე ეტაპი: ტერიტორიის მოსწორება და გრუნტის დამუშავება, სადრენაჟე სამუშაოები, დროებითი გზების მშენებლობა და გეოლოგიური კვლევები. მშენებლობის ნებართვაზე PEJ-მ განაცხადი 2026 წლის მარტში შეიტანა. კომპანიას სურს, რომ სამუშაოები 2027 წელს დაიწყოს.

პროექტზე პოლონურმა კომპანიებმა, მათ შორის Budimex-მა, Doraco-მ, Unihouse-მა, MSA Security-მა და Barg M.B Gdańsk-მა, 250 მილიონი დოლარის ღირებულების კონტრაქტები მოიპოვეს. ატომური ელექტროსადგურის ღირებულება 37 მილიარდ დოლარს შეიძლება მიაღწიოს. სადგურს სამი Westinghouse AP1000 ბლოკი ექნება, საერთო სიმძლავრით 3 750 მგვტ (MWe).

პროექტის მიზანია პოლონეთის დამოკიდებულების შემცირება ნახშირზე. ენერგეტიკული ანალიტიკური ცენტრის Ember-ის მონაცემით, ეს მაჩვენებელი ამჟამად 51%-ია. თუ დაფინანსება მოიძებნა, მეორე სადგურს სამხრეთ კორეის კომპანია Kepco ააშენებს. ის ქვეყნის ცენტრალურ ნაწილში, Patnów-Konin-ის რეგიონში განთავსდება და ორი APR 1400 რეაქტორისგან შედგება.