ლუისვილის აეროპორტს საერთაშორისო კონკორსი დაემატება

ლუისვილის მუჰამედ ალის სახელობის საერთაშორისო აეროპორტი (SDF) 60 000 კვადრატული ფუტის ახალ საერთაშორისო კონკორსს ააშენებს. პროექტი SDF Next-ის ფარგლებში განხორციელდება. ეს მრავალწლიანი კაპიტალური განვითარების პროგრამაა, რომლის ღირებულება 1 მილიარდი დოლარია. აეროპორტმა მგზავრების მიღება 1947 წელს დაიწყო, თუმცა საერთაშორისო მიმართულებით ამჟამად მხოლოდ ტვირთებს ემსახურება.

ახალ კონკორსზე ოთხი ორმაგი დანიშნულების სამგზავრო ტრაპი (ჯეტ-ბრიჯი) იქნება. ამის წყალობით გასასვლელები როგორც შიდა, ისე საერთაშორისო რეისებს მიიღებს. ლუისვილის რეგიონული აეროპორტის ადმინისტრაციის ინფორმაციით, ტენდერი ნოემბერში გაიმართება, მშენებლობა იანვარში დაიწყება და დაახლოებით სამ წელიწადს გასტანს. ადმინისტრაციის აღმასრულებელმა დირექტორმა დენ მენმა ადგილობრივ ტელეარხ WDRB-TV-სთან განაცხადა: „ჩვენ დარწმუნებული ვართ, რომ გახსნის დღესვე საერთაშორისო მიმართულება გვექნება. იმდენად დიდია მოთხოვნა“.

SDF Next 2019 წლის ბოლოს დაიწყო და ჯერი ე. აბრამსონის სახელობის ტერმინალისა და აეროდრომის გრძელვადიან მოდერნიზაციას ითვალისწინებს. ყველაზე მსხვილ პროექტებს შორისაა ტერმინალის უსაფრთხოების შემოწმების პუნქტის გაფართოება 45 მლნ დოლარად. აეროპორტის წარმომადგენლები მას ტერმინალში ბოლო 35 წელზე მეტ ხანში ყველაზე მნიშვნელოვან ცვლილებას უწოდებენ. 30 000 კვადრატული ფუტის ახალ მისაშენში TSA-ის შემოწმების ათამდე ზოლი განთავსდება. სამუშაოებს Abel Construction ასრულებს და ისინი 2027 წლის დასაწყისში უნდა დასრულდეს. მენის თქმით, არსებული ზოლები მგზავრების რაოდენობისთვის საკმარისი არ იყო და რიგები იქმნებოდა.

მიმდინარეობს სხვა პროექტებიც. 32 მლნ დოლარს მიკროქსელში დებენ, რაც აეროპორტს საჭიროების შემთხვევაში ელექტროქსელისგან დამოუკიდებლად მუშაობის საშუალებას მისცემს. გენერალური კონტრაქტორი MAC Constructing and Excavating-ია, სამუშაოები კი 2026 წლის შემოდგომაზე უნდა დასრულდეს. A და B კონკორსების უსაფრთხოების კონტროლის შემდგომ ზონებში 45 მლნ დოლარის სამუშაოებია დაგეგმილი: განახლდება აბრები და განათება, მოდერნიზდება მოსაცდელები, დაემატება დამტენი წერტილები და ავიაკომპანიების ახალი სადგამები თითოეულ გასასვლელთან. ამ სამუშაოებს Calhoun Construction ასრულებს და ისინი 2027 წლის შემოდგომაზე უნდა დასრულდეს.

E & B Paving აეროდრომზე ორ პროექტს ახორციელებს. პირველი 19,6 მლნ დოლარის ღირებულებისაა და D ტაქსივეის (Taxiway D) რეკონსტრუქციას გულისხმობს L ტაქსივეის ჩრდილოეთით, ასევე 17L-35R ასაფრენ-დასაფრენ ბილიკზე მომსახურე დამაკავშირებელ ტაქსივეებს. მეორე Taxiway B-ის მეორე ეტაპია 11,1 მლნ დოლარად. ორივე პროექტი 2026 წლის შემოდგომაზე უნდა დასრულდეს. აეროპორტმა 2024 წელს 4,8 მილიონზე მეტი მგზავრი მოემსახურა, რაც ისტორიული მაქსიმუმია და ზედიზედ მეორე წელია, როცა მგზავრთნაკადმა რეკორდს მიაღწია. ამის შესახებ აეროპორტის ადმინისტრაცია იტყობინება.