ნიუ-იორკში ხუთ ინიციატივას უყრიან კენჭს, რომლებიც მშენებლობის ნებართვების პროცესს გაამარტივებს

ნიუ-იორკის ამომრჩევლები ხუთ ინიციატივას უყრიან კენჭს. მათი მიზანია, განაახლონ ზოგადი მშენებლობის, ხელმისაწვდომი საცხოვრებლისა და ქუჩის უსაფრთხოების პროექტების მოძველებული და ზედმეტი ნებართვის მოთხოვნები. ინიციატივები ქალაქის სამთავრობო ეფექტიანობის კომისიამ და 2026 წლის ნიუ-იორკის ქარტიის განხილვის კომისიამ მოამზადა. მხარდამჭერების თქმით, ცვლილებები შეამცირებს დოკუმენტაციას, რომელსაც ქალაქის სააგენტოები კონტრაქტორებისგან ითხოვენ, დააჩქარებს ქუჩის უსაფრთხოებისა და საჰაერო უფლებების პროექტებს და შექმნის მშენებლობის ნებართვების ცენტრალიზებულ ჰაბს — ამის შესახებ ENR იტყობინება.

დეველოპერების, კონტრაქტორებისა და საპროექტო ფირმებისთვის ყველაზე მეტად მეორე, მესამე და მეოთხე კითხვა ეხება. მეორე კითხვის მიღების შემთხვევაში ქარტიაში შევა ცვლილება: გამარტივდება წინასახელშეკრულებო კითხვარი და გაუქმდება კლიენტთა მომსახურების შესახებ სავალდებულო ანგარიშის მოსმენა. ქალაქის სამთავრობო ეფექტიანობის კომისიის აღმასრულებელი დირექტორის, ენ ჩენგის განმარტებით, არსებულ ერთიან კითხვარს კონტრაქტის ტიპზე მორგებული კითხვები ჩაანაცვლებს. მისივე თქმით, ეს უფრო მცირე სამშენებლო კომპანიებსაც წაახალისებს, მონაწილეობა მიიღონ ქალაქის კონტრაქტებზე გამოცხადებულ კონკურსებში.

მესამე კითხვა ქუჩის უსაფრთხოების პროექტების განხილვას ამარტივებს, რათა შემცირდეს მშენებლობის ვადები. ქალაქის დაგეგმარების კომისიის თანხმობით ის ასევე დააჩქარებს გამოუყენებელი საქალაქო ქონების განკარგვას. ჩენგის თქმით, ამის შედეგად ქალაქისთვის უფრო მარტივი გახდება მუნიციპალურ შენობებზე, მაგალითად, ადრე ლენდმარკის სტატუსის მქონე სახანძრო სადგურზე, საჰაერო უფლებების იჯარით გაცემა. ამჟამად ამ პროცესს ორ წლამდე სჭირდება, რაც დეველოპერებს სხვაგვარად სიცოცხლისუნარიანი პროექტების განხორციელებისგან ხელს უშლის.

მეოთხე კითხვით შეიქმნება ცენტრალიზებული ჰაბი მშენებლობის ნებართვებისთვის. სანაპირო ზოლის ნებართვები მცირე ბიზნესის მომსახურების დეპარტამენტიდან შენობათა დეპარტამენტზე გადავა, მშენებლობის დამტკიცების უფლებამოსილება კი დეპარტამენტის დამატებით თანამშრომლებსაც ექნებათ. დეველოპერებსა და მშენებლებს ექნებათ ერთიანი ონლაინ პორტალი, სადაც თავიანთი პროექტების ყველა განსახილველ ნებართვას ნახავენ და არ მოუწევთ სხვადასხვა სააგენტოში მიმართვა. გარდა ამისა, ექსპლუატაციაში მიღების სერტიფიკატების დამტკიცება ქალაქის დონის თანამდებობის პირებსაც შეეძლებათ და ამისთვის ბოროს დონის სამშენებლო დეპარტამენტების მონაწილეობა აღარ იქნება საჭირო. ამ უფლებამოსილებას შენობათა დეპარტამენტის თანამშრომლებს ქალაქის შენობათა კომისარი გადასცემს. ჩენგის თქმით, ეს მნიშვნელოვანი ცვლილებაა და ხელმისაწვდომი საცხოვრებლის დეველოპერების გამოხმაურებას ეფუძნება.

ნიუ-იორკის სამშენებლო კონგრესის პრეზიდენტისა და აღმასრულებელი დირექტორის, კარლო სკისურას თქმით, 18 ოფისში არსებული 40 ნებართვის ერთ ჰაბში გაერთიანება და ქალაქის არასაკმარისად გამოყენებული ქონებიდან 200 მილიონ დოლარზე მეტი ღირებულების გამოთავისუფლება სწორედ ის რეფორმებია, რომლებსაც ინდუსტრია ითხოვდა. კომპანია Monadnock Development-ის პრეზიდენტმა კირკ გუდრიჩმა არსებული ბიუროკრატია ხელმისაწვდომი საცხოვრებლის მშენებლობის ერთ-ერთ უდიდეს ბარიერად დაასახელა.