ONE Development Ambassadori Island Batumi-ზე 200 მილიონ დოლარს დააბანდებს

Ambassadori Island Batumi-მ და გაერთიანებულ არაბთა საემირატოებში დაფუძნებულმა დეველოპერმა ONE Development-მა საერთაშორისო პარტნიორობის ხელშეკრულება გააფორმეს. შეთანხმების პირობებით, ONE Development Ambassadori Island-ზე მაღალი კლასის მრავალფუნქციური კომპლექსის ასაშენებლად 200 მილიონ დოლარს დააბანდებს.

დოკუმენტს ხელი მოაწერეს Ambassadori Island Batumi-ის აღმასრულებელმა დირექტორმა გოჩა კამკიამ და ONE Development-ის ჯგუფის აღმასრულებელმა დირექტორმა მუსტაფა რაშადმა. ცერემონია აბუ-დაბიში, გამოფენა LIVEX 2026-ის ფარგლებში გაიმართა. Ambassadori Island Batumi ფორუმს ONE Development-ის, ღონისძიების სტრატეგიული პარტნიორის, მოწვევით ესწრება. გამოფენა 29 სექტემბრიდან 1 ოქტომბრამდე მიმდინარეობს აბუ-დაბის ეროვნულ საგამოფენო ცენტრში (ADNEC). ეს აბუ-დაბის პირველი გამოფენაა ცხოვრების ხარისხისა და ინვესტიციების თემაზე, მას მუნიციპალიტეტებისა და ტრანსპორტის დეპარტამენტი აწყობს. ოფიციალური მონაცემებით, ღონისძიებას 50-ზე მეტი ქვეყნის 20 000-ზე მეტი დამსწრე ესწრება, მათ შორის 1 500-ზე მეტი ინსტიტუციური ინვესტორი.

ONE Development აბუ-დაბიში დაფუძნებული საერთაშორისო დეველოპერია, რომელსაც აბუ-დაბისა და დუბაის შოურუმები აქვს. კომპანია საკუთარ თავს რეგიონის პირველ, ხელოვნური ინტელექტით ინტეგრირებულ დეველოპერად წარმოაჩენს. მისი მთავარი პროექტი, Laguna Residence დუბაის City of Arabia-ში, 2 მილიარდი დირჰამის ღირებულებისაა და მოიცავს ორ მაღალ კოშკს, პოდიუმის დონეზე მოწყობილ დიდ ლაგუნას და ცხოვრების სტილის, ველნესისა და სოციალური დანიშნულების 40-ზე მეტ სივრცეს. კომპანია სასტუმროების სექტორშიც აქტიურად აფართოებს საქმიანობას: მხატვარ ამრ დიაბთან თანამშრომლობით მან სასტუმროების ბრენდი ONE/AD ამოქმედა, რომლის ქვეშაც DO Hotels გააცნო.

გოჩა კამკიას თქმით, ONE Development-ის გამოცდილების წყალობით კუნძულზე ხელოვნურ ინტელექტსა და უახლეს ტექნოლოგიებზე დაფუძნებული პირველი ურბანული პროექტი განხორციელდება. Ambassadori Group შავი ზღვის პირველ ხელოვნურ კუნძულს საერთაშორისო კომპანიებთან ერთად აშენებს. მათ შორის არიან საინჟინრო და საკონსულტაციო ფირმა Arup, არქიტექტურულ-საინჟინრო კომპანია Yüksel Proje და ამერიკული არქიტექტურული ბიურო SHoP Architects.