Caterpillar ჩრდილოეთ კაროლინის ქარხნის გაფართოებაში 1 მილიარდ დოლარს ჩადებს

ამერიკული კომპანია Caterpillar ჩრდილოეთ კაროლინაში, ქალაქ სენფორდში არსებული საწარმოს გასაფართოებლად 1 მილიარდ დოლარს ჩადებს. პროექტის ფარგლებში აშენდება ახალი ობიექტი, სადაც კომპაქტურ მუხლუხოიან დამტვირთველებსა და ტელესკოპურ დამტვირთველებს (telehandlers) აწარმოებენ. ინვესტიციის მიზანია მცირე ბიზნესის მხრიდან გაზრდილ მოთხოვნაზე რეაგირება.

კომპანიის განმარტებით, ეს ტექნიკა გამოიყენება მშენებლობაში, ლანდშაფტის მოწყობაში, სოფლის მეურნეობასა და ტვირთების გადაადგილებაში.

გაფართოებისთვის ჩრდილოეთ კაროლინის საწარმო იმის გამო აირჩიეს, რომ Caterpillar-ს შტატში ძლიერი წარმომადგენლობა და მოქმედი საწარმოები აქვს, ასევე იქ ადგილობრივი სამუშაო ძალაა.

Caterpillar-ის სამშენებლო ინდუსტრიების მიმართულების პრეზიდენტმა, Rod Shurman-მა განაცხადა: „კომპაქტური ტექნიკის მოთხოვნა სულ უფრო იზრდება, ამიტომ ვაინვესტირებთ იმისთვის, რომ ამ მზარდი სეგმენტის მომხმარებლებს უკეთ ვემსახუროთ“. მისი თქმით, ეს ინვესტიცია კიდევ ერთი გზაა, რომლითაც კომპანია მომხმარებლების ყველაზე რთულ ამოცანებს წყვეტს: ზრდის მათთვის საჭირო პროდუქტების, გადაწყვეტილებებისა და სერვისების ხელმისაწვდომობას, რათა უფრო ეფექტიანად იმუშაონ.

კომპანიის თქმით, პროექტი სამუშაო ადგილებს შექმნის ავტომატიზაციის, რობოტექნიკის, ციფრული წარმოებისა და მოწინავე საწარმოო სისტემების მიმართულებით. ამის შესახებ Global Construction Review იტყობინება.