Motif-მა ბრაუზერზე დაფუძნებული BIM პლატფორმა Motif Design წარადგინა

Motif-მა გამოუშვა დაპროექტების პლატფორმა Motif Design. ეს არის ბრაუზერზე დაფუძნებული ღრუბლოვანი BIM გარემო, სადაც ხელოვნური ინტელექტი დიზაინის პროცესშივეა ჩართული. მისი აგენტები ეხმარებიან მომხმარებელს იტერაციაში, ხაზვასა და საპროექტო სივრცეში მოპირკეთების მასალების, პროდუქტებისა და სხვა 3D ობიექტების ჩასმაში. ამის შესახებ ENR იტყობინება.

Motif Autodesk-ის ყოფილი ხელმძღვანელების დაარსებული 46 მილიონი დოლარის სტარტაპია და 2025 წელს დაიწყო საქმიანობა. AI აქ ჩატბოტის ან თანაშემწის როლში კი არ არის, არამედ დაპროექტების პროცესშია ჩართული და მონაცემთა მოდელის გარეთ არ იმყოფება.

პლატფორმა ღრუბლოვან სერვერზე მუშაობს და აჩვენებს გეგმასა და 3D ხედს რეალურ დროში. მას შეუძლია პარამეტრული კედლების, კარებისა და ავეჯის შექმნა. ENR-ის შეხვედრაზე Motif-ის წარმომადგენლებთან განსაკუთრებული ყურადღება პროგრამის ინტერიერის დიზაინის ფუნქციას დაეთმო. მოდელში შეტანილი ცვლილებები ავტომატურად აისახება ნახაზებსა და გეგმებზე.

Motif-ის მონაცემთა ბაზას Revit-ისა და IFC-ის სქემების იმპორტი დანაკარგის გარეშე შეუძლია. Revit-ში უკან ექსპორტი ჯერ შეუძლებელია, თუმცა იმ ფირმებისთვის, რომლებსაც Revit-ის შენარჩუნება სურთ, სამუშაო პროცესი უკვე არსებობს. IFC-ის კლასებისა და ელემენტების შეცვლა შესაძლებელია პირდაპირ Motif-ში, ცვლილება კი მოდელსა და გეგმებზეც აისახება.

Skidmore Owings & Merrill-მა (SOM) პროგრამა გამოსცადა და მის შემუშავებაშიც შეიტანა წვლილი. SOM-ის CTO Shane Burger-ის თქმით, გუნდები ზედმეტ დროს ხარჯავენ არსებული პროგრამების შეზღუდვების გვერდის ავლაზე და არა თავად დიზაინზე. Motif-ის CTO Brian Mathews ამბობს, რომ კომპანია არსებულ პროდუქტზე დანამატს კი არ ქმნის, არამედ სრულფასოვან BIM სისტემას.