Mesabi Metallics აიოვაში ფოლადის ქარხნის ასაშენებლად 15 მილიარდ დოლარს ჩადებს

მინესოტაში დაფუძნებული კომპანია Mesabi Metallics სამხრეთ-აღმოსავლეთ აიოვაში ფოლადის ქარხნის ასაშენებლად 15 მილიარდ დოლარს ჩადებს. კიდევ 3 მილიარდი დოლარი მინესოტაში რკინის მადნის საბადოს მშენებლობის დასასრულებლადაა გათვალისწინებული. კომპანია ინდური კონგლომერატის, Essar Group-ის ნაწილია. ამის შესახებ ENR იტყობინება.

ქარხანა ლის ოლქში (Lee County) აშენდება. კომპანიის თქმით, ეს აშშ-ში ფოლადის ერთ ობიექტში განხორციელებული ყველაზე დიდი ინვესტიციაა. 2030 წელს ამოქმედების შემდეგ ქარხანა თავდაპირველად წელიწადში დაახლოებით 7,5 მილიონ ტონა ფოლადს აწარმოებს. სიმძლავრეების დამატებასთან ერთად წარმოება საბოლოოდ 10 მილიონ ტონამდე გაიზრდება. პროექტი 28 სექტემბერს გამოცხადდა.

Mesabi Metallics-ის აღმასრულებელი დირექტორის, ჯო ბროკინგის (Joe Broking) თქმით, მშენებლობის პერიოდში 6 000-ზე მეტი სამუშაო ადგილი შეიქმნება. ბროკინგი ამბობს, რომ პროექტი „100%-ით ამერიკულ“ მიწოდების ჯაჭვს დაეყრდნობა, თუმცა სამშენებლო გუნდი ჯერ არ დასახელებულა. კომპანიის მონაცემით, ექსპლუატაციაში შესვლის შემდეგ ქარხანა მინიმუმ 1 750 ადამიანს დაასაქმებს.

ქარხანაში გამოიყენებენ ცხელი პირდაპირი აღდგენის რკინისა და ელექტრორკალური ღუმელის ტექნოლოგიებს. კომპანიის განმარტებით, ეს ენერგომოხმარებასა და ემისიებს მნიშვნელოვნად შეამცირებს.

ქარხანას რკინის მადნის პელეტებით მინესოტას ჩრდილოეთ ნაწილში მდებარე ნაშუოკის (Nashwauk) საბადო მოამარაგებს. კომპანია მას აშშ-ში ბოლო 50 წლის განმავლობაში აშენებულ პირველ ახალ საბადოდ მიიჩნევს. სამშენებლო მოედანზე ამჟამად 1 500-ზე მეტი მუშაა, საბადოზე კი დაახლოებით 200 ადამიანია სრულ განაკვეთზე დასაქმებული. სრული სიმძლავრით მუშაობისას ეს რიცხვი 350-მდე გაიზრდება. SEC-ისთვის წარდგენილი დოკუმენტის მიხედვით, 31 მაისის მონაცემებით საბადოს პროექტი 95,5%-ით იყო დასრულებული.

ქარხნის აიოვაში აშენებას მინესოტას წარმომადგენელმა, რესპუბლიკელმა სპენსერ აიგომ (Spencer Igo) Facebook-ის პოსტში „მძიმე დარტყმა“ უწოდა.